提早更年期發噏風唔駛理我

Hmm, 基本上,我唔係一個貪靚嘅人，細個嘅時候頭髮勁厚，好似個罩笠咁，粗框老套眼鏡，面上重有好大粒墨〔提子乾咁大〕．．．於是好多冇口德嘅人鍾意叫我〔大粒墨〕，〔Anyway,小學生邊會有口德，顧慮咁多野呢？哩個好自然嘅〕重成日有事冇事搵野嚟取笑我一番。



醜其實冇罪嘅，但好多人鍾意恥笑人地樣衰，話人地影響市容，踩人唔駛本，完全係人身攻擊，好無禮好賤格下流。

後來我配咗contact lens，經常去salon整頭髮，脫埋粒墨，上吓化妝班，留意時裝雜誌買下時尚衣物，於是由醜小鴨，變身成為一隻野雁．．．

好老實講，我從來冇以為自己個樣好掂，因為骨子裡我係醜女，外表嘅改變只係唔想再俾人奚落被人白眼成為別人笑柄；好多人都好膚淺，只注意外表，當然，漂亮嘅事物就梗係吸引啦～但因為人家個look較輸蝕就又踩又彈，點解唔睇清楚自己係咪好完美無瑕啫！

我地當然可以好自由咁對人評頭論足，但至少唔好聒不知恥地公開話人地點醜點核突，講得出哩d說話，個樣得唔得，唔敢講，但可以肯定嘅係，佢個內心，好醜陋。